Универзитетот во Истанбул денеска соопшти дека поради нерегуларности ја поништиле дипломата на Екрем Имамоглу, главниот политички ривал на турскиот претседател Реџеп Таип Ердоган, нанесувајќи ѝ удар на опозицијата, која требаше да го избере за претседателски кандидат во наредните денови.
Без универзитетска диплома, градоначалникот на Истанбул Екрем Имамоглу од главната опозициска Републиканска народна партија (ЦХП) не може да се кандидира за претседател.
Тој рече дека одлуката на Универзитетот е незаконска и надвор од неговите надлежности и дека ќе се жали до судот.
„Ќе се бориме против оваа незаконска одлука“
„Ќе ја донесеме оваа незаконска одлука на суд и ќе се бориме против неа“, рече тој, додавајќи: „Не верувам во правични одлуки“.
„Нема да се откажам, нема да се заморувам. Екрем повеќе не е предмет на оваа постапка, целата нација е предмет на оваа постапка, сè што народот стекнал и постигнал е во опасност“, додаде тој.
Владата на Ердоган негира дека врши политички притисок врз судовите и тврди дека судството е независно.
Одлуката е донесена во контекст на зголемената правна репресија против опозициските политичари, особено Имамоглу, против кого се покренати неколку обвиненија.
© Vecer.mk, правата за текстот се на редакцијата
